Þulur, barnagælur og fleira

Ávallt hefur verið sungið og kveðið fyrir börn bæði til að róa þau og svæfa, en einnig til að kenna þeim og skemmta eða jafnvel skjóta þeim skelk í bringu. Við þetta eru ýmist notaðar stuttar vísur eða löng kvæði og þulur. Engin kveðskapargrein ber þess eins sterk merki að vera munnlegur kveðskapur og þulur. Þær eru ljóð í mjög frjálsu formi þar sem aldrei eru erindaskil, stuðlasetning mjög frjáls og rím oftast aðeins einfalt endarím. Oft eru þær draumkenndar, frásögnin fer úr einu í annað.