Þjóðlagasetur sr. Bjarna Þorsteinssonar

Í Þjóðlagasetrinu eru íslensk þjóðlög kynnt á aðgengilegan og skemmtilegan hátt. Þar er boðið upp á myndbönd af fólki á öllum aldri sem syngur, kveður eða leikur á hljóðfæri. Sagt er frá þjóðlagasöfnun sr. Bjarna Þorsteinssonar, greint frá heimildarmönnum hans og mörgum þeim sem aðstoðuðu hann við söfnunina víða um land.

Í Þjóðlagasetrinu á Siglufirði gefur að líta myndbandsupptökur af fólki á öllum aldri, víðs vegar að af landinu. Þær voru gerðar árið 2006 þegar undirbúningur fyrir opnun Þjóðlagaseturs stóð sem hæst, einnig haustið sama ár og vorið 2007. Landmark-kvikmyndagerð sá um upptökur en Gunnsteinn Ólafsson stjórnaði þeim og valdi efni. Þar gefur að heyra kvæðalög, barnagælur og þulur, sálma og „druslur“ auk þess sem leikið er á langspil og íslenska fiðlu. Hér er sýnishorn af söng og kveðskap úr myndbandasafni Þjóðlagaseturs í stærri eða minni gerð. Fyrst má sjá og heyra mæðginin Maríu Jónsdóttur og Jón Ólafsson á Kirkjulæk í Fljótshlíð; síðan Þórð Tómasson á Skógum; og síðast Ásgeir Sigurðsson á Ljótarstöðum í Skaftártungu. Hér má nálgast Quick Time forritið.

Loks eru á sýningunni munir úr eigu þeirra sr. Bjarna og Sigríðar Blöndal konu hans. Í þjóðlagasetri má sjá sýnishorn af handritum sr.  Bjarna, bæði þjóðlög og eigin tónsmíðar. Þar eru hljóðfæri sýnd og almennur fróðleikur settur fram á lifandi hátt. Setrið hyggst gangast fyrir gerð námsefnis um íslenskan tónlistararf fyrir grunn- og framhaldsskóla, stuðla að rannsóknum á þjóðlagaarfinum og standa að námskeiðum um íslenska tónlist.

Þjóðlagasetur sr. Bjarna Þorsteinssonar var vígt við hátíðlega athöfn af herra Ólafi Ragnari Grímssyni forseta, þann 8. júlí 2006.