Árlega er haldin tónlistarhátíð á Siglufirði sem hefur það að markmiði að kynna þjóðlagaarf ólíkra þjóða og þjóðarbrota. Á hátíðinni hefur tónlist fjölmargra þjóða verið kynnt auk þess sem íslensk þjóðlög sitja ætíð í öndvegi. Þjóðlagahátíðin stendur frá miðvikudegi til sunnudags fyrstu heilu vikuna í júlí ár hvert. Auk tónleika er boðið upp á fjölmörg námskeið, bæði í tónlist og handverki, gömlu og nýju. Þá er börnum þátttakenda boðið upp á ókeypis námskeið í leiklist og tónlist.
Listrænn stjórnandi hátíðarinnar frá upphafi hefur verið Gunnsteinn Ólafsson, tónlistarmaður.
Lógó Þjóðlagahátíðar er hannað af Ágústi Bjarnasyni myndlistarmanni.
Þjóðlagahátíðin vann Eyrarrósina árið 2005. Eyrarrósin eru viðurkenning og verðlaun sem veitt eru fyrir menningarstarfsemi á landsbyggðinni sem þykir með einhverjum hætti skara framúr. Verðlaunin eru samstarfsverkefni Listahátíðar í Reykjavík, Byggðastofnunar og Flugfélags Íslands. Verðlaunagripur Eyrarrósarinnar er eftir Steinunni Þórarinsdóttur og verndari er Dorrit Moussaieff, forsetafrú.
Forsaga Þjóðlagahátíðar á Siglufirði
Þjóðlagahátíð á Siglufirði var fyrst haldin sumarið 2000 fyrir tilstuðlan Félags um Þjóðlagasetur sr. Bjarna Þorsteinssonar á Siglufirði, Reykjavíkur, menningarborgar Evrópu árið 2000 og Siglufjarðarkaupstaðar. Hátíðin er skipulögð í nafni Félags um Þjóðlagasetur sr. Bjarna Þorsteinssonar, en samstarfsaðilar á Siglufirði eru Síldarminjasafnið og Siglufjarðarkirkja. Þá hefur Norræni menningarsjóðurinn styrkt hátíðina tvisvar og Menningarborgarsjóður þrisvar.
Markmið Þjóðlagahátíðar á Siglufirði
- að hvetja til varðveislu íslenskra þjóðlaga
- að stuðla að nýsköpun íslenskrar tónlistar
- að stefna saman listamönnum úr ólíkum áttum
- að varpa ljósi á menningararf Íslendinga og annarra þjóða
- að höfða til allrar fjölskyldunnar, barna, unglinga og fullorðinna
- að virkja heimamenn til samvinnu við innlenda og erlenda listamenn
- að halda nafni þjóðlagasafnarans sr. Bjarna Þorsteinssonar á lofti
- að verða einn hornsteina í starfsemi þjóðlagaseturs á Siglufirði
Aðsókn að Þjóðlagahátíðinni á Siglufirði hefur vaxið jafnt og þétt undanfarin ár. Erlendir og innlendir listamenn sem komið hafa fram á hátíðinni eru á annað hundrað talsins og tugir kennara hafa kennt þar á námskeiðum. Tónleikagestum hefur fjölgað mjög síðustu árin. Í upphafi voru þeir um fjögur til fimm hundruð en síðustu ár hefur þeim fjölgað í sex til sjö hundruð. Fjölskyldur alls staðar að af landinu gera sér ferð til Siglufjarðar til þess að sækja tónleika og taka þátt í námskeiðum, enda er lögð áhersla á að allir finni þar eitthvað við sitt hæfi.
Námskeiðin á þjóðlagahátíð eru bæði á sviði tónlistar og forns handverks. Sum eru haldin ár hvert, önnur sjaldnar. Börnum er einnig boðið upp á sérstök námskeið og sumarið 2004 var haldið í fyrsta skipti sérstakt námskeið fyrir unglinga. Enda þótt hátíðin leggi áherslu á að rækta íslenskan þjóðlagaarf hafa fjölmörg tónverk verið frumflutt á hátíðinni.
