Háskólakórinn

Háskólakórinn var stofnaður árið 1972 og hefur frá upphafi sungið við helstu samkomur Háskóla Íslands. Í kórnum syngja nemendur úr öllum deildum og öðrum menntastofnunum á háskólastigi, íslenskir sem erlendir. Háskólakórinn hefur kappkostað að kynna metnaðarfulla tónlist fyrir félögum sínum jafnframt því að stuðla að framgangi kórtónlistar á Íslandi með því að frumflytja ný verk eftir íslensk tónskáld. Ekki er síður hefð í Háskólakórnum fyrir flutningi eldri verka, stundum sjaldheyrðra, og hefur hann jafnvel frumflutt sum þeirra á Íslandi. Þá hefur kórinn á tveggja ára fresti farið utan og kynnt íslenska tónlist á erlendri grund. Gunnsteinn Ólafsson tók við stjórn kórsins árið 2007.