Þjóðlagasetur sr. Bjarna Þorsteinssonar

Á degi íslenskrar tungu 16. nóvember 2012 var Þjóðlagasetri sr. Bjarna Þorsteinssonar  á Siglufirði afhent sérstök viðurkenning fyrir þátt sinn í varðveislu tungumálsins. Menntamálaráðherra Katrín Jakobsdóttir afhenti viðurkenninguna í Álftanesskóla. Gunnsteinn Ólafsson og Dúi Landmark tóku við viðurkenningunni fyrir hönd setursins en þeir hafa allt frá árinu 2005 unnið saman að því að kvikmynda fólk við söng og kveðskap, hljóðfæraleik og dans fyrir setrið. Hannes Pétursson fékk Jónasaraverðlaunin svonefndu og veitti þeim viðtöku við sömu athöfn. Háskólakórinn söng undir stjórn Gunnsteins lög við ljóð Jónasar Hallgrímssonar og Snorra Hjartarsonar. Þjóðlagasetrið var sett á fót árið 2006 og hefur tekið á móti hátt í tíu þúsund gestum frá stofnun, þar á meðal fjölmörgum skólahópum.

Þjóðlagahátíðin árið 2013 verður haldin dagana 3. til 7. júlí 2013. Á hátíðinni verður lögð áhersla á leikhústengda þjóðlagatónlist. Þeir sem hafa áhuga á því að koma fram á hátíðinni hafi samband við Gunnstein Ólafsson á netfanginu gol@ismennt.is.

Þjóðlagahátíðin 2012 byrjar þann 4. júlí. Margir listamenn koma fram á hátíðinni og hægt verður að fara á alls konar námskeið. Einnig verður þjóðlagaakademían starfrækt eins og undanfarin ár. 

ÞjóðList og Kvæðamannafélagið Ríma í Fjallabyggð standa fyrir kvæðamannamóti laugardaginn 3. mars, í samstarfi við kvæðamannafélagið Gefjunni á Akureyri og með stuðningi Menningarráðs Eyþings og Þjóðlagseturs.  Það eru starfandi kvæðamannafélög víða um land, fámenn og einangruð, en aðstandendur mótsins hafa fulla trú á því að ef við tökum höndum saman þá verður það til þess að efla þessa hverfandi þjóðarhefð.

Á mótinu verður þriggja klst. námskeið (2x1,5 klst) sem Bára Grímsdóttir kvæðakona sér um. Hún mun kenna okkur hefbundin kvæðalög og flutningsmáta þeirra, ásamt ýmsu öðru sem við kemur kvæðamennskunni.

Bára og maður henna Chris Foster, sem er virtur enskur þjóðlagasöngvari, eru með þjóðlagadúettinn Funaog koma beint frá því að taka þátt í þjóðtónlistarhátíð í Sviss.  Þau munu halda stutta tónleika laugardaginn 3. mars kl. 16:30 á Kaffi Rauðku, þar sem við fáum að heyra nokkuð af því efni sem þau fluttu í Sviss.

Hápunktur mótsins verður síðan kvöldvaka með glæsilegum kvöldverði á Kaffi Rauðku, þar sem kvæðamenn stíga á stokk, og gömludansaball í lokin. 

Dagskrá kvæðamannamótsins er nú tilbúin.

Lesa meira